YSG 的部落格

　　今晚平安夜，近年來第一次沒有隨教會報佳音。現在翻箱倒籠，把去年聖誕晚會詩歌環節的稿子拿出來，也來報佳音一番。

　　大家聖誕快樂！睇番呢個月嘅程序表先至發現，原來除咗尋日浸禮崇拜一次過唱咗幾首之外，今年都冇乜唱過聖誕歌，幾乎一個禮拜至得一首。所以呢，今晚，我唔理嘞，要唱七首聖誕歌。希望大家都唱得高興，帶住份喜樂嘅心情慶祝聖誕。

　　大家知唔知耶穌出世嗰年嘅二月有咩事發生咗呢？係嘞，就係馬利亞有咗ＢＢ。個情景大概係點呢？

天使加百列入咗馬利亞間屋，就對佢講：「蒙大恩嘅女子，你好嘛，主與你同在呀！你已經喺神面前蒙恩，你要懷胎生ＢＢ，可以幫佢起名叫耶穌。佢要為大，佢要稱為至高者嘅兒子，主神要將佢祖先大衛嘅位交畀佢；佢要做雅各家嘅王，直到永遠，佢嘅國度無窮無盡。聖靈要臨到你嘅身上，至高者嘅能力要蔭庇你，所以，呢位將要出世嘅，必定稱為聖，稱為神嘅兒子。」馬利亞點答呢？雖然佢唔明白，但係佢話：「我係主嘅使女，願意照你嘅話成就。」

〈我心尊主為大〉

我心尊主為大　我心尊主為大
我靈以我神以我的主為樂
我心尊主為大　我心尊敬你

　　咁由馬利亞有咗ＢＢ，到懷胎十月——我假設咗耶穌唔係七星仔——又有咩事發生呢？聖經冇講，但係我估馬利亞同約瑟多少都會擔心，會不斷咁求問神，究竟嚟緊會發生咩事。但係我哋梗係知道啦，因為聖經預言咗畀我哋聽。

西面為佢哋祝福，又對耶穌嘅媽媽馬利亞講：「呢個小朋友被立，係要叫以色列裡面好多人跌倒，好多人興起；又要成為人哋毀謗嘅話柄，叫好多人心裏嘅意念顯露出嚟。就算係你自己嘅心，都要俾刀刺透。」

〈以馬內利〉

上帝施恩預言救贖罪人　應許賜下救主降～凡塵
千秋歷代列國～～萬民　渴想一天得脫開～苦困
普天蒼生　被囚禁於黑暗　引頸渴望救主快～來臨

慈愛之主請快施恩拯救　眾生盼待了多少～時候
空虛靈魂沒有～～自由　沒法解開罪和死的詛咒
高天之主　願垂聽～祈求　永生盼望快將～～成就
歡欣　歡欣　萬民必得拯救　永生盼望快將～～成就

　　好快就到咗十二月，耶穌要出世喇！但係喺呢個時候，

約瑟要去猶太，要到大衛之城伯利恆，同馬利亞一齊報名上冊。呢個時候，馬利亞要臨盆喇，產期到喇；咁就生咗頭一胎，係仔嚟嘅。佢哋用布包住ＢＢ，放喺馬槽度，因為客店冇地方畀佢哋住。

〈平安夜〉

平安夜　聖善夜　萬暗中　光華射
照著聖母也照著聖嬰　多少慈祥也多少天真
靜享天賜安眠　靜享天賜安眠

眾生盼望　救主靠近　將希望賜眾人
造物的主宰已經降臨　用自己雙手抱擁世人
基督於今夜誕生　安躺在小伯利恆

　　我諗，雖然聖經冇講，但係馬利亞生耶穌嗰陣，應該係幾「哩 hea」嘅。既然客店冇房，要住馬槽，咁一定唔會有 room service 啦。而耶穌又係第一胎，約瑟都未必幫得上手。但係，我哋要先將鏡頭 pan 過去另一邊，就係伯利恆嘅野地，因為喺個度，

忽然，有一大隊天兵同一位天使響度讚美神，話：「在至高之處，榮耀歸與神！在地上，平安歸與他所喜悅的人！」

〈夜半歌聲〉

緬想當年時方夜半　忽來榮耀歌聲
天使屈身俯向塵寰　歡然手撥金琴
地上平安　人增友誼　天賜～特殊～奇恩
當晚世界沉寂之中　靜聽天使歌聲

平安屬於世上凡～人　榮耀屬那至高之君
琴音伴歌韻異常動人　旋律自遠～而近
天軍隨旋～律臨～近　歡欣慶賀著這時辰
平安夜天使～來凡塵　傳頌上帝～憐憫

呢班喺伯利恆野地嘅牧羊人，正係喺度輪緊夜更，睇住Ｄ羊。聽到天使咁講，佢地就話：「我們去伯利恆咯，睇下主指示我哋嘅事會點樣成就。」佢哋趕到去，就搵到馬利亞同約瑟，而個ＢＢ就瞓響馬槽度。佢哋一睇到，就即刻將天使講嘅嘢傳開嘞。嗰Ｄ聽到牧羊人講嘅呢件事都好詫異。牧羊人因為佢哋聽到同見到嘅嘢，都同天使向佢哋講嘅一模一樣，就歸榮耀畀神，讚美神。

〈天使初報聖誕佳音〉

天使初報聖誕佳音　先向田間貧苦牧人
牧人正當看守羊群　嚴冬方冷　長夜已深
讚揚　頌恩　歡欣　歌唱　基督今已降生世上

牧人同往伯利恆城　見馬槽內躺臥聖嬰
既見一切如主指示　便獻感謝　讚美主名
讚揚　頌恩　歡欣　歌唱　基督今已降生世上

牧人望天　但見蒼天星宿　尤是一～顆景星　夜空中照耀
帶來亮光　賢士得知方向　尋覓新～生國君　欲衷心拜伏
讚揚　頌恩　歡欣　歌唱　基督今已降生世上

　　咁究竟天使同牧羊人講咗Ｄ咩呢？

天使話：「我而家要傳報畀你哋呢個大喜嘅信息，係關乎萬民嘅，因為喺今日，喺大衛之城度，為你哋生咗救主，就係主基督！你哋要見到一個ＢＢ，包住布，瞓響馬槽度，呢個就係記號嘞。」

　　就正如以賽亞話：

有一個嬰孩為我哋而生，佢要稱為「奇妙策士、全能的神、永在的父、和平的君」。佢必定喺大衛嘅寶座上治理佢嘅國，以公平公義令國堅定穩固，從今直到永遠。萬軍之耶和華嘅熱心必定成就呢件事。

〈在大衛城裡〉

昔在大衛王之城裡　有一卑陋小馬棚
內有母親生一兒子　將其纏裹放槽中
馬利亞乃慈母名　主耶穌是她所生

奇哉神子全能恩主　竟然離天降下方
只有草棚遮蔽風霜　只有馬槽當臥床
榮耀主降居世上　甘作卑微將苦嚐

昔是孩童溫柔仁厚　今在天上為我王
到了末日靠祂援救　可得親見其榮光
祂引導群孩前往　得到達華美天堂

　　耶穌出世嘅事跡就去到呢度，但係事情仲未完結，因為我哋仲有一首歌要唱：〈普世歡騰〉，我哋要將耶穌為我哋降生呢件事傳開去！你預備好未？

〈普世歡騰〉

普世歡騰　救主已降　全地接祂為王
萬心為主預備地方
宇宙萬物頌揚　宇宙萬物頌揚
宇宙　宇宙萬物頌揚

樂哉大地　救主統領　世人都當歌頌
田野、江河、平原、山嶺
喜音繚繞不停　喜音繚繞不停
喜音　喜音繚繞不停

罪孽憂愁全當止息　無地再長荊棘
我主來臨　使福充溢
主恩深厚無比　主恩深厚無比
主恩　主恩深厚無比

註：歌詞選編自《祢是王》、《美樂頌》、《團契遊樂園》、《頌主新歌》、《頌主聖詩》。